ಕೋಲಾರದ (Kolara) ಶ್ರೀ ದೇವರಾಜ್ ಅರಸು ಉನ್ನತ ಶಿಕ್ಷಣ ಮತ್ತು ಸಂಶೋಧನಾ ಸಂಸ್ಥೆ (ಪರಿಗಣಿತ ವಿಶ್ವವಿದ್ಯಾಲಯ) ವತಿಯಿಂದ ನಿವೃತ್ತ ಐಎಎಸ್ ಅಧಿಕಾರಿ ಎಸ್.ಎನ್. ಜಯರಾಮ್ (N.S.Jayaram) ಅವರಿಗೆ ಗೌರವ ಡಾಕ್ಟರೇಟ್ (ಪಿಎಚ್.ಡಿ ಹಾನರಿಸ್ ಕಾಸಾ) (PHd Honouris KASA) ಪದವಿಯನ್ನು ನೀಡಿ ಗೌರವಿಸಿದೆ. ಮೇ 18 ರಂದು ನಡೆದ ವಿಶ್ವವಿದ್ಯಾಲಯದ 16ನೇ ವಾರ್ಷಿಕ ಘಟಿಕೋತ್ಸವದಲ್ಲಿ ಈ ಪ್ರಶಸ್ತಿಯನ್ನು ಪ್ರದಾನ ಮಾಡಲಾಯಿತು. ಎಸ್.ಎನ್. ಜಯರಾಮ್ ಅವರ ನಿಷ್ಕಳಂಕ ಆಡಳಿತ ಸೇವೆ ಹಾಗೂ ಅವರು 2016 ರಲ್ಲಿ ಪ್ರಾರಂಭಿಸಿದ ಜಾಗತಿಕ ಮಟ್ಟದ ವಿಶಿಷ್ಟ ಸಂಸ್ಥೆಯನ್ನು ಗುರುತಿಸಿ ಈ ಉನ್ನತ ಗೌರವವನ್ನು ನೀಡಲಾಗಿದೆ.
ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದ ‘ಜಿಐ ಟ್ಯಾಗ್ಡ್’ ಸಂಸ್ಥೆ:
ಎಸ್.ಎನ್. ಜಯರಾಮ್ ಅವರು ‘ಭೌಗೋಳಿಕ ಸೂಚಕಗಳ ಟ್ಯಾಗ್ ಹೊಂದಿದ ವಿಶ್ವ ಪ್ರೀಮಿಯಂ ಉತ್ಪನ್ನಗಳ’ (Geographical Indications Tagged World Premium Products) ಸಂಸ್ಥೆಯ ಸಂಸ್ಥಾಪಕ ಅಧ್ಯಕ್ಷರು ಮತ್ತು ವ್ಯವಸ್ಥಾಪಕ ನಿರ್ದೇಶಕರಾಗಿದ್ದಾರೆ. ಭಾರತ ಸರ್ಕಾರದ ‘ಭೌಗೋಳಿಕ ಸೂಚಕಗಳ (ನೋಂದಣಿ ಮತ್ತು ರಕ್ಷಣೆ) ಕಾಯ್ದೆ 1999’ ರ ಅಡಿಯಲ್ಲಿ ಈ ಕಂಪನಿಯು ಕಾರ್ಯನಿರ್ವಹಿಸುತ್ತಿದೆ.
ಕೇವಲ ಜಿಐ ಟ್ಯಾಗ್ ಹೊಂದಿರುವ ಉತ್ಪನ್ನಗಳಿಗಾಗಿಯೇ ಮೀಸಲಾದ ಇಂತಹ ಕಂಪನಿಯು ಭಾರತ ದೇಶದಲ್ಲೇ ಮಾತ್ರವಲ್ಲದೆ ಇಡೀ ವಿಶ್ವದಲ್ಲೇ ಮೊದಲನೆಯದಾಗಿದೆ. ದೇಶದ ಸಾಂಪ್ರದಾಯಿಕ ಮತ್ತು ಭೌಗೋಳಿಕ ಗುರುತು ಹೊಂದಿರುವ ಜಿಐ ಉತ್ಪನ್ನಗಳನ್ನು ಸಂರಕ್ಷಿಸುವುದು, ರಕ್ಷಿಸುವುದು ಮತ್ತು ಉತ್ತೇಜಿಸುವುದು ಈ ಸಂಸ್ಥೆಯ ಮುಖ್ಯ ಉದ್ದೇಶವಾಗಿದೆ.
ದೇಶದ ಎಲ್ಲಾ ಜಿಐ ಉತ್ಪನ್ನಗಳನ್ನು ‘ಜಿಐ ಟ್ಯಾಗ್ಡ್’ ಎಂಬ ಒಂದೇ ಸೂರಿನಡಿ ತರುವುದು ಕಂಪನಿಯ ಪ್ರಮುಖ ಗುರಿಯಾಗಿದೆ. “ಪ್ರಪಂಚವನ್ನು ಅದರ ಬೇರುಗಳೊಂದಿಗೆ ಜೋಡಿಸುವುದು” ಎಂಬುದು ಈ ವಿಶಿಷ್ಟ ಸಂಸ್ಥೆಯ ದೂರದೃಷ್ಟಿಯಾಗಿದೆ.
ಆಡಳಿತ ರಂಗದಲ್ಲಿ ಹಾಗೂ ದೇಶದ ಸಾಂಪ್ರದಾಯಿಕ ಉತ್ಪನ್ನಗಳಿಗೆ ಜಾಗತಿಕ ಮನ್ನಣೆ ದೊರಕಿಸಿಕೊಡುವಲ್ಲಿ ಎಸ್.ಎನ್. ಜಯರಾಮ್ ಅವರು ಮಾಡಿರುವ ಸಾಧನೆಗೆ ಸಂದ ಈ ಗೌರವವು ಅತ್ಯಂತ ಶ್ಲಾಘನೀಯವಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.