“ಕಿಶೋರ್ ಕುಮಾರ್ – ದಿ ವಾಯ್ಸ್ ಆಫ್ ಜಾಯ್, ಪೇನ್ ಅಂಡ್ ರೊಮ್ಯಾನ್ಸ್” ಸಂಗೀತ ಸಂಜೆಗೆ ಅಮೋಘ ಸ್ಪಂದನೆ

ಬೆಂಗಳೂರು, ಜೂ.28: ಪ್ರಹ್ಲಾದ್ ಮೀರಾ ಅಕಾಡೆಮಿಯಿಂದ ಚೌಡಯ್ಯ ಸ್ಮಾರಕ ಭವನದಲ್ಲಿ ಆಯೋಜಿಸಿದ್ದ “ದಿ ಇಮ್ಮಾರ್ಟಲ್ಸ್: ಕಿಶೋರ್ ಕುಮಾರ್ – ದಿ ವಾಯ್ಸ್ ಆಫ್ ಜಾಯ್(The Voice of Joy), ಪೇನ್ ಅಂಡ್ ರೊಮ್ಯಾನ್ಸ್”(Pain and Romance) ಸಂಗೀತ ಸಂಜೆ ಸಂಗೀತಾಭಿಮಾನಿಗಳಿಗೆ ಅದ್ಭುತ ರಸದೌತಣವನ್ನು ಉಣಬಡಿಸಿತು.

   ಪ್ರಹ್ಲಾದ್ ಪ್ರಸಾದ್ ತಂಡದ ಗಾಯಕರು ನಡೆಸಿಕೊಟ್ಟ ಈ ಕಾರ್ಯಕ್ರಮ ಹಿಂದಿ ಚಿತ್ರರಂಗದ ದಂತಕಥೆ ಹಿನ್ನೆಲೆ ಗಾಯಕ ಕಿಶೋರ್ ಕುಮಾರ್ ಅವರಿಗೆ ಭಾವಪೂರ್ಣ ಸಂಗೀತ ನಮನವಾಗಿತ್ತು.

   ತಮ್ಮ ಅಮರ ಗಾಯನದ ಮೂಲಕ ಹಲವು ತಲೆಮಾರುಗಳ ಸಂಗೀತಾಸಕ್ತರ ಹೃದಯದಲ್ಲಿ ಅಚ್ಚಳಿಯದೆ ಉಳಿದಿರುವ ಕಿಶೋರ್ ಕುಮಾರ್ ಅವರ ಸದಾಬಹಾರ ಗೀತೆಗಳನ್ನು ಈ ಕಾರ್ಯಕ್ರಮದಲ್ಲಿ ಮನಮೋಹಕವಾಗಿ ಪ್ರಸ್ತುತಪಡಿಸಲಾಯಿತು. ಸಂತೋಷ, ನೋವು, ಪ್ರೀತಿ, ವಿರಹ ಮತ್ತು ನೆನಪುಗಳ ಭಾವನೆಗಳನ್ನು ಹೊತ್ತು ತಂದ ಅವರ ಹಾಡುಗಳು ಸಂಗೀತ ಪ್ರೇಮಿಗಳನ್ನು ಭಾವಲೋಕಕ್ಕೆ ಕರೆದೊಯ್ದವು.

   ಪ್ರಹ್ಲಾದ್ ಪ್ರಸಾದ್, ದಿವ್ಯಾ ರಾಘವನ್ ಹಾಗೂ ಬೆಹ್ರದ್ ನರ್ಸಿ ಅವರು ಕಿಶೋರ್ ಕುಮಾರ್ ಅವರ ಅನೇಕ ಅಮರ ಗೀತೆಗಳನ್ನು ಅತ್ಯಂತ ಸುಮಧುರವಾಗಿ ಹಾಡಿದರು. ಮೂಲ ಗಾಯನದ ಸೊಗಡನ್ನು ಉಳಿಸಿಕೊಂಡು ತಮ್ಮದೇ ಆದ ಗಾಯನ ಶೈಲಿಯೊಂದಿಗೆ ಹಾಡುಗಳನ್ನು ಪ್ರಸ್ತುತಪಡಿಸಿದ ಕಲಾವಿದರ ಪ್ರತಿಯೊಂದು ಗಾಯನಕ್ಕೂ ಪ್ರೇಕ್ಷಕರು ಭರ್ಜರಿ ಕರತಾಡನದ ಮೂಲಕ ಮೆಚ್ಚುಗೆ ವ್ಯಕ್ತಪಡಿಸಿದರು.

   ಭಾರತೀಯ ಚಿತ್ರಸಂಗೀತದ ಸುವರ್ಣಯುಗವನ್ನು ರೂಪಿಸಿದ ದಂತಕಥೆಯ ಸಂಗೀತ ನಿರ್ದೇಶಕ ಆರ್. ಡಿ. ಬರ್ಮನ್ ಅವರ ಅಮೋಘ ಸಂಗೀತ ಸಂಯೋಜನೆಗಳಿಗೆ ಗೌರವ ನಮನ ಸಲ್ಲಿಸಿದರು. ಇಡೀ ಕಾರ್ಯಕ್ರಮದುದ್ದಕ್ಕೂ ಪ್ರೇಕ್ಷಕರು ತಲ್ಲೀನರಾಗಿ ಅನೇಕ ಜನಪ್ರಿಯ ಗೀತೆಗಳಿಗೆ ಕಲಾವಿದರೊಂದಿಗೆ ಗುನುಗುತ್ತಾ ಸಂಗೀತವನ್ನು ಆಸ್ವಾದಿಸಿದರು. ಪ್ರತಿಯೊಂದು ಗಾಯನವೂ ಕರತಾಡನ ಮತ್ತು ಹರ್ಷೋದ್ಗಾರಗಳಿಂದ ಮೊಳಗಿತು. ಕೊನೆಯಲ್ಲಿ ಪ್ರೇಕ್ಷಕರು ಎದ್ದು ನಿಂತು ಗೌರವ ಸಲ್ಲಿಸುವ ಮೂಲಕ ಕಲಾವಿದರನ್ನು ಅಭಿನಂದಿಸಿದರು.