ಕತಾರ್‌ನಲ್ಲಿ ಕನ್ನಡಿಗ ಶಿಕ್ಷಕರಿಗೆ ಸನ್ಮಾನ ಹಾಗೂ ಶಿಕ್ಷಕರ ದಿನಾಚರಣೆ

ದೋಹಾ: ಸಮಾಜ ನಿರ್ಮಾಣದಲ್ಲಿ ಶಿಕ್ಷಕರು ಶಿಕ್ಷಣತಜ್ಞರ ಪಾತ್ರವನ್ನು ಸ್ಮರಿಸುವ ನಿಟ್ಟಿನಲ್ಲಿ ಕರ್ನಾಟಕ ಸಂಘ ಕತಾರ್(Kathar) ವತಿಯಿಂದ ಶಿಕ್ಷಕರ ದಿನಾಚರಣೆಯನ್ನು(Teachers’ Day Celebration) ವಿಜೃಂಭಣೆಯಿಂದ ಆಚರಿಸಲಾಯಿತು. ಭಾರತೀಯ ರಾಯಭಾರ ಕಚೇರಿಯ ಆಶ್ರಯದಲ್ಲಿ ಹಾಗೂ ಭಾರತೀಯ ಸಾಂಸ್ಕೃತಿಕ ಕೇಂದ್ರದ (ಐಸಿಸಿ) ಸಂಯೋಜಿತ ಸಂಸ್ಥೆಯಾಗಿ ಕಾರ್ಯನಿರ್ವಹಿಸುತ್ತಿರುವ ಕರ್ನಾಟಕ ಸಂಘ ಕತಾರ್ ಈ ಕಾರ್ಯಕ್ರಮವನ್ನು ಅಶೋಕ ಸಭಾಂಗಣದಲ್ಲಿ ವಿಜೃಂಭಣೆಯಿಂದ ಆಯೋಜಿಸಲಾಗಿತ್ತು.

ಕಾರ್ಯಕ್ರಮದ ಆರಂಭದಲ್ಲಿ ಭಾರತದ ಮಾಜಿ ರಾಷ್ಟ್ರಪತಿ ಹಾಗೂ ಶ್ರೇಷ್ಠ ಶಿಕ್ಷಣತಜ್ಞ ಡಾ.ಸರ್ವಪಲ್ಲಿ ರಾಧಾಕೃಷ್ಣನ್ ಅವರ ಭಾವಚಿತ್ರಕ್ಕೆ ಪುಷ್ಪನಮನ ಸಲ್ಲಿಸಲಾಯಿತು. ಬಳಿಕ ಕರ್ನಾಟಕ ಸಂಘ ಕತಾರ್‌ನ ಮಕ್ಕಳಿಂದ ಸಾಂಪ್ರದಾಯಿಕ ಸ್ವಾಗತ ನೃತ್ಯ ಪ್ರದರ್ಶನಗೊಂಡಿತು. ಕರ್ನಾಟಕದ ಸಾಂಸ್ಕೃತಿಕ ವೈಭವವನ್ನು ಪರಿಚಯಿಸಿದ ಈ ನೃತ್ಯ ಕಾರ್ಯಕ್ರಮ ಸಭಿಕರ ಮೆಚ್ಚುಗೆಗೆ ಪಾತ್ರವಾಯಿತು.

ಕರ್ನಾಟಕ ಸಂಘ ಕತಾರ್‌ನ ಪ್ರಧಾನ ಕಾರ್ಯದರ್ಶಿ ಸುಜಿತ್ ಕುಮಾರ್ ಹೊಸದುರ್ಗ ಅವರು ಗಣ್ಯರು, ಮುಖ್ಯ ಅತಿಥಿಗಳು, ಶಿಕ್ಷಕರು ಹಾಗೂ ಸಮುದಾಯದ ಸದಸ್ಯರನ್ನು ಸ್ವಾಗತಿಸಿದರು. ಅಧ್ಯಕ್ಷ ಸುಬ್ರಹ್ಮಣ್ಯ ಹೆಬ್ಬಾಗಿಲು ಅವರು ಅಧ್ಯಕ್ಷೀಯ ಭಾಷಣ ಮಾಡಿ, ಸಂಸ್ಥೆಯ ವಿವಿಧ ಜನಪರ ಚಟುವಟಿಕೆಗಳು ಹಾಗೂ ಸಮಾಜ ನಿರ್ಮಾಣದಲ್ಲಿ ಶಿಕ್ಷಕರ ಮಹತ್ವದ ಪಾತ್ರವನ್ನು ವಿವರಿಸಿದರು. ಕತಾರ್‌ನ ಕನ್ನಡಿಗರಿಂದ ದೊರೆಯುತ್ತಿರುವ ನಿರಂತರ ಬೆಂಬಲಕ್ಕೆ ಕೃತಜ್ಞತೆ ಸಲ್ಲಿಸಿದರು.

Teachers’ Day Media Gallery:
https://photos.app.goo.gl/4yohumd3oqHsmVyRA

ಗಣ್ಯರ ಉಪಸ್ಥಿತಿ:
ಕಾರ್ಯಕ್ರಮದಲ್ಲಿ ಭಾರತೀಯ ರಾಯಭಾರ ಕಚೇರಿಯ ಉಪ ರಾಯಭಾರಿ ಹಾಗೂ ನಿಯೋಜಿತ ರಾಯಭಾರ ಅಧಿಕಾರಿ (ಚಾರ್ಜ್ ಡಿ ಅಫೇರ್ಸ್) ಸಂದೀಪ್ ಕುಮಾರ್ ಹಾಗೂ ಕರ್ನಾಟಕ ಸರ್ಕಾರದ ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಡಾ. ಪುರುಷೋತ್ತಮ ಬಿಳಿಮಲೆ ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡಿದ್ದರು.

ಹಿರಿಯ ಶಿಕ್ಷಣ ತಜ್ಞೆ, ಕತಾರ್ ಶಿಕ್ಷಣ ಮತ್ತು ಉನ್ನತ ಶಿಕ್ಷಣ ಸಚಿವಾಲಯದ ಡಾ. ಅಭಿಲಾಷಾ ಪನ್ವಾರ್, ಡಿಪಿಎಸ್ ಶಿಕ್ಷಣ ಸಂಸ್ಥೆಗಳ ಸಮೂಹ ಶೈಕ್ಷಣಿಕ ನಿರ್ದೇಶಕಿ ಆಸ್ನಾ ನಫೀಸ್, ಭಾರತೀಯ ಸಾಂಸ್ಕೃತಿಕ ಕೇಂದ್ರದ (ಐಸಿಸಿ) ಅಧ್ಯಕ್ಷ ಎ.ಪಿ. ಮಣಿಕಂಠನ್, ನಿರ್ದೇಶಕ, ನೃತ್ಯ ಸಂಯೋಜಕ ಹಾಗೂ ಸಂಗೀತ ಮಾರ್ಗದರ್ಶಕ ಫೈಸಲ್ ಅಲ್-ದೋಸಾರಿ, ಕ್ರೀಡೆ ಮತ್ತು ಕರಾಟೆ ಶಿಕ್ಷಕಿ ಮರ್ಯಮ್ ಅಲಿ ಹಯಾತಿ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.

ಭವನ್ಸ್ ಸಾರ್ವಜನಿಕ ಶಾಲೆಯ ಅಧ್ಯಕ್ಷ ಪಿ.ಎನ್. ಬಾಬುರಾಜನ್, ಡಿಪಿಎಸ್ ಮೋನಾರ್ಕ್ ಅಂತರರಾಷ್ಟ್ರೀಯ ಶಾಲೆಯ ಅಧ್ಯಕ್ಷ ರಾಕಿ ಫರ್ನಾಂಡಿಸ್ ಹಾಗೂ ಡಿಪಿಎಸ್-ಮಾಡರ್ನ್ ಇಂಡಿಯನ್ ಸ್ಕೂಲ್‌ನ ಉಪಾಧ್ಯಕ್ಷ ಸನ್ನಿ ವರ್ಗೀಸ್ ಸೇರಿದಂತೆ ವಿವಿಧ ಶಾಲೆಗಳ ಆಡಳಿತ ಮಂಡಳಿಯ ಪ್ರಮುಖರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

ಕತಾರ್‌ನ ಆಂತರಿಕ ಸಚಿವಾಲಯದ ಸಮುದಾಯ ಪೊಲೀಸ್ ವಿಭಾಗದ ಲೆಫ್ಟಿನೆಂಟ್ ನಾಸರ್ ಮುಹಮ್ಮದ್ ಅಲ್ ಮುಸೈಫಿರಿ, ಬಾಲಾಪರಾಧ ತಡೆ ಪೊಲೀಸ್ ವಿಭಾಗದ ಲೆಫ್ಟಿನೆಂಟ್ ಹುಸೇನ್ ಖಾಸಿಮ್, ಸಾರ್ವಜನಿಕ ಸಂಪರ್ಕ ವಿಭಾಗದ ಫೈಸಲ್ ಅಲ್ ಹುದಾವಿ ಹಾಗೂ ಅಜೀಜುರ್ ರಹಮಾನ್ ಉಪಸ್ಥಿತರಿದ್ದರು.

ಶಾಲಾ ಮುಖ್ಯಸ್ಥರಿಗೆ ಗೌರವ:
ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯಾಗಿದ್ದ ಸನ್ಮಾನ ಸಮಾರಂಭದಲ್ಲಿ ಕತಾರ್‌ನ ವಿವಿಧ ಪ್ರಮುಖ ಶಿಕ್ಷಣ ಸಂಸ್ಥೆಗಳ ಮುಖ್ಯಸ್ಥರು ಹಾಗೂ ಪ್ರಾಂಶುಪಾಲರನ್ನು ಗೌರವಿಸಲಾಯಿತು.

ಅಲ್-ಖೋರ್ ಅಂತರರಾಷ್ಟ್ರೀಯ ಶಾಲೆ, ಬಿರ್ಲಾ ಸಾರ್ವಜನಿಕ ಶಾಲೆ, ಭವನ್ಸ್ ಸಾರ್ವಜನಿಕ ಶಾಲೆ, ದೋಹಾ ಮಾಡರ್ನ್ ಇಂಡಿಯನ್ ಸ್ಕೂಲ್, ರಾಜಗಿರಿ ಸಾರ್ವಜನಿಕ ಶಾಲೆ, ಬ್ರಿಲಿಯಂಟ್ ಅಂತರರಾಷ್ಟ್ರೀಯ ಶಾಲೆ, ನೋಬಲ್ ಅಂತರರಾಷ್ಟ್ರೀಯ ಶಾಲೆ, ಶಾಂತಿನಿಕೇತನ ಇಂಡಿಯನ್ ಸ್ಕೂಲ್, ಸ್ಕಾಲರ್ಸ್ ಅಂತರರಾಷ್ಟ್ರೀಯ ಶಾಲೆ, ಆಲೀವ್ ಅಂತರರಾಷ್ಟ್ರೀಯ ಶಾಲೆ, ಪೋಡಾರ್ ಪರ್ಲ್ ಶಾಲೆ, ಗ್ರೀನ್‌ವುಡ್ ಅಂತರರಾಷ್ಟ್ರೀಯ ಶಾಲೆ, ಡಿಪಿಎಸ್ ಮೋನಾರ್ಕ್ ಅಂತರರಾಷ್ಟ್ರೀಯ ಶಾಲೆ, ಲೊಯೊಲಾ ಅಂತರರಾಷ್ಟ್ರೀಯ ಶಾಲೆ, ಡಿಪಿಎಸ್-ಮಾಡರ್ನ್ ಇಂಡಿಯನ್ ಸ್ಕೂಲ್, ಎಂ.ಇ.ಎಸ್. ಇಂಡಿಯನ್ ಸ್ಕೂಲ್, ಗ್ಯಾಲಿಸಿಯೋ ಅಂತರರಾಷ್ಟ್ರೀಯ ಶಾಲೆ, ಎಂ.ಇ.ಎಸ್.ಐ.ಎಸ್. ಹಾಗೂ ಐಡಿಯಲ್ ಇಂಡಿಯನ್ ಶಾಲೆಯ ಮುಖ್ಯಸ್ಥರು ಮತ್ತು ಪ್ರಾಂಶುಪಾಲರನ್ನು ಸನ್ಮಾನಿಸಲಾಯಿತು.

ಇದರೊಂದಿಗೆ ಕತಾರ್‌ನ ವಿವಿಧ ಶಾಲೆಗಳಲ್ಲಿ ಸೇವೆ ಸಲ್ಲಿಸುತ್ತಿರುವ ಸುಮಾರು 125 ಕರ್ನಾಟಕ ಮೂಲದ ಶಿಕ್ಷಕರನ್ನು ಕರ್ನಾಟಕ ಸಂಘ ಕತಾರ್ ವತಿಯಿಂದ ಗೌರವಿಸಲಾಯಿತು. ಪ್ರತಿಯೊಬ್ಬ ಶಿಕ್ಷಕರಿಗೂ ಕನ್ನಡ ನಾಡಿನ ಸಾಂಪ್ರದಾಯಿಕ ಶಾಲು ಹೊದಿಸಿ, ನೆನಪಿನ ಕಾಣಿಕೆ ಹಾಗೂ ಪ್ರಶಸ್ತಿ ಪತ್ರ ನೀಡಿ ಸನ್ಮಾನಿಸಲಾಯಿತು.

ಕನ್ನಡದ ಕಂಪು:
ಸನ್ಮಾನ ಕಾರ್ಯಕ್ರಮದ ನಡುವೆ ಕರ್ನಾಟಕ ಸಂಘ ಕತಾರ್‌ನ ಪುಟಾಣಿಗಳಿಂದ ವಿಶೇಷ ಗಾಯನ ಕಾರ್ಯಕ್ರಮವೂ ನಡೆಯಿತು. ಕಾರ್ಯಕ್ರಮದಲ್ಲಿ ಮಾತನಾಡಿದ ಗಣ್ಯರು ಕನ್ನಡ ಭಾಷೆ ಮತ್ತು ಸಂಸ್ಕೃತಿಯ ಶ್ರೀಮಂತಿಕೆಯನ್ನು ಕೊಂಡಾಡಿದರು. ವಿದೇಶದಲ್ಲಿಯೂ ಕನ್ನಡದ ಅಸ್ಮಿತೆ ಹಾಗೂ ಸಾಂಸ್ಕೃತಿಕ ಬೇರುಗಳನ್ನು ಉಳಿಸಿ ಬೆಳೆಸುವಲ್ಲಿ ಕರ್ನಾಟಕ ಸಂಘ ಕತಾರ್‌ನ ಸೇವೆಯನ್ನು ಶ್ಲಾಘಿಸಿದರು.

ಮುಖ್ಯ ಅತಿಥಿ ಡಾ. ಪುರುಷೋತ್ತಮ ಬಿಳಿಮಲೆ ಅವರು ಮಾತನಾಡಿ, ಕತಾರ್‌ನಲ್ಲಿರುವ ಕನ್ನಡಿಗರು ತಮ್ಮ ಸಾಂಸ್ಕೃತಿಕ ಬೇರುಗಳನ್ನು ಗಟ್ಟಿಯಾಗಿ ಉಳಿಸಿಕೊಂಡಿರುವುದಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದರು.

ಕರ್ನಾಟಕ ಸಂಘ ಕತಾರ್ ಅಧ್ಯಕ್ಷ ಸುಬ್ರಹ್ಮಣ್ಯ ಹೆಬ್ಬಾಗಿಲು ಹಾಗೂ ಕಾರ್ಯಕಾರಿ ಸಮಿತಿಯ ನೇತೃತ್ವದಲ್ಲಿ ನಡೆದ ಕಾರ್ಯಕ್ರಮಕ್ಕೆ ಕತಾರ್‌ನ ಭಾರತೀಯ ಸಮುದಾಯದಿಂದ ವ್ಯಾಪಕ ಬೆಂಬಲ ವ್ಯಕ್ತವಾಯಿತು.

ಐಸಿಬಿಎಫ್ ಪ್ರಧಾನ ಕಾರ್ಯದರ್ಶಿ ದೀಪಕ್ ಶೆಟ್ಟಿ, ಐಸಿಸಿ ಸಮಿತಿಯ ಕರ್ನಾಟಕ ಪ್ರತಿನಿಧಿ ಸಂದೀಪ್ ರೆಡ್ಡಿ, ಕರ್ನಾಟಕ ಸಂಘದ ಸಲಹಾ ಸಮಿತಿ ಅಧ್ಯಕ್ಷ ರವಿ ಶೆಟ್ಟಿ, ಸಲಹೆಗಾರರಾದ ಅರುಣ್ ಕುಮಾರ್, ಹೆಚ್.ಕೆ. ಮಧು, ಡಾ. ಸಂಜಯ್ ಕುದರಿ, ಐಸಿಸಿ ಮಾಜಿ ಅಧ್ಯಕ್ಷೆ ಮಿಲನ್ ಅರುಣ್ ಸೇರಿದಂತೆ ಐಸಿಸಿ, ಐಸಿಬಿಎಫ್, ಐಸಿಬಿಎ ಸಂಸ್ಥೆಗಳ ಪದಾಧಿಕಾರಿಗಳು ಹಾಗೂ ಕರ್ನಾಟಕದ ವಿವಿಧ ಸಹೋದರ ಸಂಘಟನೆಗಳ ಪ್ರಮುಖರು ಉಪಸ್ಥಿತರಿದ್ದರು.

ಅಂತರರಾಷ್ಟ್ರೀಯ ನಿರೂಪಕಿ ಹಾಗೂ ಮಾಧ್ಯಮ ಪ್ರಭಾವಿ ಅಂಶು ಜೈನ್ ಕಾರ್ಯಕ್ರಮವನ್ನು ನಿರೂಪಿಸಿದರು. ಕಾರ್ಯಕ್ರಮದ ಕೊನೆಯಲ್ಲಿ ಗೌರವಾನ್ವಿತ ಅತಿಥಿ ಫೈಸಲ್ ಅಲ್-ದೋಸಾರಿ ಅವರ ಗಿಟಾರ್ ವಾದನ ಗಮನ ಸೆಳೆಯಿತು.

ಕಾರ್ಯಕ್ರಮಕ್ಕೆ ಸಹಕಾರ ನೀಡಿದ ಮನ್ನೈ ಹೋಮ್ ಮತ್ತು ಒನ್ಲಿ ಕಾಫಿ ಸಂಸ್ಥೆಗಳಿಗೆ ಕರ್ನಾಟಕ ಸಂಘ ಕತಾರ್ ಕೃತಜ್ಞತೆ ಸಲ್ಲಿಸಿತು. ಸಂಘದ ಉಪಾಧ್ಯಕ್ಷ ಅನಿಲ್ ಭಾಸಗಿ ವಂದನಾರ್ಪಣೆ ಸಲ್ಲಿಸಿದರು.

*20 ಮಂದಿಗೆ ಉಚಿತ ಕಾಶಿ–ಪ್ರಯಾಗ್ ಯಾತ್ರೆ : ಉಚಿತ ವಿಮಾನ ಪ್ರಯಾಣದ ಸೌಭಾಗ್ಯ* – ಶಾಸಕ ಎಂ. ಕೃಷ್ಣಪ್ಪ