ಅಂಬಿಗರ ಚೌಡಯ್ಯನವರ ವಚನಗಳಲ್ಲಿ ವೈಚಾರಿಕತೆ, ವ್ಯಂಗ್ಯ, ವಿಡಂಬನೆ ಹಾಗೂ ಬಂಡಾಯದ ಮನೋಧರ್ಮ ಎದ್ದು ಕಾಣುತ್ತವೆ ಎಂದು ವಿಶ್ರಾಂತ ಪ್ರಾಧ್ಯಾಪಕ ಹಾಗೂ ವಿಮರ್ಶಕ ಡಾ. ಎಸ್.ಎಚ್. ಭುವನೇಶ್ವರ ಹೇಳಿದರು.
ಶ್ರೀ ಕೃಷ್ಣ ಪದವಿ ಕಾಲೇಜಿನಲ್ಲಿ ನಡೆದ ಅಂಬಿಗರ ಚೌಡಯ್ಯನವರ ಕುರಿತ ಕೃತಿ ಲೋಕಾರ್ಪಣೆ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು. ಬದಲಾವಣೆ ಜಗದ ನಿಯಮವಾದರೂ, ಹಳೆಯ ಬೇರಿನೊಂದಿಗೆ ಹೊಸ ಚಿಗುರು ಬೆಸೆಯುವಂತಹ ಬದಲಾವಣೆ ಅಗತ್ಯ. ಕ್ಷಣಿಕವಾದ ಸಂಗತಿಗಳ ಹಿಂದೆ ಹೋಗದೆ, ಶಾಶ್ವತ ಮೌಲ್ಯಗಳ ಜ್ಞಾನವನ್ನು ಅರಸಬೇಕು ಎಂದರು.
ಅಂಬಿಗರ ಚೌಡಯ್ಯ ವೃತ್ತಿಯಲ್ಲಿ ನಾವಿಕರಾಗಿದ್ದರೂ ಅನುಭಾವಿ ಹಾಗೂ ಸಮಾಜಮುಖಿ ಚಿಂತಕರಾಗಿದ್ದರು. ತೀಕ್ಷ್ಣವಾದ ಭಾಷೆಯ ಮೂಲಕ ಸಮಾಜವನ್ನು ಎಚ್ಚರಿಸಿದ ಅವರು, ಅಸಮಾನತೆ ಹಾಗೂ ಅನಿಷ್ಟ ಆಚರಣೆಗಳ ವಿರುದ್ಧ ಧ್ವನಿ ಎತ್ತಿದರು. ಶರಣ ಚಳವಳಿ ಮತ್ತು ಅನುಭವ ಮಂಟಪದ ಆಶಯಗಳು ಅವರ ವಚನಗಳಲ್ಲಿ ಪ್ರತಿಬಿಂಬಿಸುತ್ತವೆ ಎಂದರು.
ಕೃತಿಯ ಕುರಿತು ಮಾತನಾಡಿದ ಡಾ. ಆರ್. ವಾದಿರಾಜು, ಕಾಯಕತತ್ವ, ಅಂತರಂಗ–ಬಹಿರಂಗ ಶುದ್ಧತೆ, ಮಾನವೀಯತೆ ಹಾಗೂ ಪರಸ್ಪರ ಗೌರವದಂತಹ ಮೌಲ್ಯಗಳನ್ನು ಕೃತಿ ಒಳಗೊಂಡಿದೆ. ಇದು ವಿಮರ್ಶಾತ್ಮಕ ದೃಷ್ಟಿಯಿಂದ ಉತ್ತಮ ಕೃತಿಯಾಗಿದೆ ಎಂದರು.
ಕೃತಿಕಾರ ಡಾ. ಚೌಡಯ್ಯ ಮಾತನಾಡಿ, ಅಂಬಿಗರ ಚೌಡಯ್ಯನವರು ಕಾಯಕನಿಷ್ಠೆಯೊಂದಿಗೆ ಬದುಕಿ, ಸಮಾಜದಲ್ಲಿನ ಅಸಮಾನತೆಗಳ ವಿರುದ್ಧ ಸಾಹಿತ್ಯದ ಮೂಲಕ ಪ್ರತಿಭಟಿಸಿದರು. ಸಮಸಮಾಜ ನಿರ್ಮಾಣವೇ ಅವರ ಆಶಯವಾಗಿತ್ತು. ಅವರ ಮೌಲ್ಯಯುತ ಜೀವನ, ಚಿಂತನೆ ಹಾಗೂ ಆದರ್ಶಗಳನ್ನು ಇಂದಿನ ಸಮಾಜ ಅಳವಡಿಸಿಕೊಳ್ಳಬೇಕು ಎಂದರು.
ವಿ. ಗೋವಿಂದರಾಜು, ಡಾ. ಎಚ್. ತುಕಾರಾಂ, ಡಾ. ಗಿರಿಯಪ್ಪ, ಡಾ. ಎಂ. ಶಿವಸ್ವಾಮಿ ಸೇರಿದಂತೆ ಪ್ರಾಧ್ಯಾಪಕರು, ಟ್ರಸ್ಟ್‌ನ ಪದಾಧಿಕಾರಿಗಳು, ಕವಿಗಳು, ಗಾಯಕರು ಹಾಗೂ ಸಾಹಿತ್ಯಾಸಕ್ತರು ಉಪಸ್ಥಿತರಿದ್ದರು.