ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ(Delhi) ಹಳೆಯ ವಸತಿ ಕಟ್ಟಡವೊಂದು ಕುಸಿದು ಮೂರು ವರ್ಷದ ಮಗು ಸೇರಿದಂತೆ ಇಬ್ಬರು ಮೃತಪಟ್ಟಿರುವ ದಾರುಣ ಘಟನೆ ನಡೆದಿದೆ. ಪೂರ್ವ ದೆಹಲಿಯ ಶಹದಾರ ಜಿಲ್ಲೆಯ ವಿವೇಕ್ ವಿಹಾರ್ನ ಜ್ವಾಲಾ ನಗರ(Jwala Nagara) ಪ್ರದೇಶದಲ್ಲಿ ನವೆಂಬರ್ 17ರ ಮಂಗಳವಾರ ಬೆಳಗ್ಗೆ ಈ ಘಟನೆ ಸಂಭವಿಸಿದೆ. ಕಟ್ಟಡ ಕುಸಿತದಿಂದ(Due to Building collapse) ನಾಲ್ವರು ಗಾಯಗೊಂಡಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಈ ದುರಂತದ ಬೆನ್ನಲ್ಲೇ ರೈಲ್ವೆ ಹಳಿ ಸಮೀಪದ ಅತಿಕ್ರಮಣ, ಹಳೆಯ ಕಟ್ಟಡಗಳ ನಿರ್ವಹಣೆ ಮತ್ತು ಕಟ್ಟಡ ಸುರಕ್ಷತಾ ನಿಯಮಗಳ ಅನುಷ್ಠಾನದ ಬಗ್ಗೆ ಹಲವು ಪ್ರಶ್ನೆಗಳು ಎದ್ದಿವೆ.
40ರಿಂದ 50 ವರ್ಷ ಹಳೆಯ ಕಟ್ಟಡ
ಘಟನೆಗೆ ಸಂಬಂಧಿಸಿದಂತೆ ಮುನ್ಸಿಪಲ್ ಕಾರ್ಪೊರೇಷನ್ ಆಫ್ ಡೆಲ್ಲಿ (MCD) ಪ್ರಾಥಮಿಕ ವರದಿ ನೀಡಿದೆ. ಅದರ ಪ್ರಕಾರ, ಕುಸಿದ ಕಟ್ಟಡ ಸುಮಾರು 40ರಿಂದ 50 ವರ್ಷ ಹಳೆಯದಾಗಿತ್ತು. ಈ ಕಟ್ಟಡವು ರೈಲ್ವೆ ಇಲಾಖೆಗೆ ಸೇರಿದ ಅತಿಕ್ರಮಿತ ಜಾಗದಲ್ಲಿದ್ದು, ರೈಲ್ವೆ ಹಳಿಯಿಂದ ಸುಮಾರು 24 ಮೀಟರ್ ದೂರದಲ್ಲಿತ್ತು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ನೆಲಮಹಡಿ, ಮೊದಲ ಮಹಡಿ ಹಾಗೂ ಭಾಗಶಃ ನಿರ್ಮಾಣವಾಗಿದ್ದ ಎರಡನೇ ಮಹಡಿಯನ್ನು ಈ ಕಟ್ಟಡ ಹೊಂದಿತ್ತು. ಮೊದಲ ಮಹಡಿಯ ಮೇಲ್ಛಾವಣಿಯ ಕೆಂಪು ಕಲ್ಲಿನ ಹಲಗೆಗಳು ಮತ್ತು ಎರಡನೇ ಮಹಡಿಗೆ ಆಧಾರವಾಗಿದ್ದ ಕಬ್ಬಿಣದ ಗರ್ಡರ್ಗಳು ಕುಸಿದ ಪರಿಣಾಮ ಕಟ್ಟಡದ ಭಾಗಗಳು ನೆಲಕ್ಕುರುಳಿವೆ ಎಂದು ಪ್ರಾಥಮಿಕ ವರದಿ ತಿಳಿಸಿದೆ.
ಮಗು ಸೇರಿದಂತೆ ಇಬ್ಬರು ದುರ್ಮರಣ
ಈ ಘಟನೆಯಲ್ಲಿ ಮೃತಪಟ್ಟವರನ್ನು ಮೂರು ವರ್ಷದ ದೇವಾಂಶ್ ಪಾಸ್ವಾನ್ (ಲಡ್ಡು) ಮತ್ತು 35 ವರ್ಷದ ಪಿಂಟು ಸಿಂಗ್ ಎಂದು ಗುರುತಿಸಲಾಗಿದೆ. ದೇವಾಂಶ್ ತನ್ನ ಕುಟುಂಬದೊಂದಿಗೆ ಕಟ್ಟಡದ ಮೊದಲ ಮಹಡಿಯಲ್ಲಿ ವಾಸಿಸುತ್ತಿದ್ದರೆ, ಪಿಂಟು ಸಿಂಗ್ ನೆಲಮಹಡಿಯಲ್ಲಿದ್ದ ಕೆಲಸಗಾರರಲ್ಲಿ ಒಬ್ಬರಾಗಿದ್ದರು.
ಕಟ್ಟಡ ಕುಸಿತದಲ್ಲಿ ಖುಷ್ಬು (27), ವಿಕೇಶ್ ಸಿಂಗ್ (35), ಆಕಾಶ್ (25) ಮತ್ತು ದಲಿಪ್ ಕುಮಾರ್ (22) ಗಾಯಗೊಂಡಿದ್ದಾರೆ. ಗಾಯಾಳುಗಳನ್ನು ರಕ್ಷಿಸಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಘಟನಾ ಸ್ಥಳಕ್ಕೆ ದೆಹಲಿ ಅಗ್ನಿಶಾಮಕ ದಳ, ಪೊಲೀಸರು, ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪಡೆ (NDRF) ಮತ್ತು ಸ್ಥಳೀಯ ಆಡಳಿತದ ಅಧಿಕಾರಿಗಳು ಧಾವಿಸಿ ರಕ್ಷಣಾ ಕಾರ್ಯಾಚರಣೆ ನಡೆಸಿದರು.
ರೈಲುಗಳ ಕಂಪನದಿಂದ ಕಟ್ಟಡ ಕುಸಿದಿತೇ?
ಈ ದುರಂತಕ್ಕೆ ಕಟ್ಟಡದ ಹಳೆಯ ಸ್ಥಿತಿ ಮಾತ್ರವಲ್ಲದೆ, ಸಮೀಪದಲ್ಲಿರುವ ರೈಲ್ವೆ ಹಳಿಗಳೂ ಕಾರಣವಾಗಿರಬಹುದು ಎಂಬ ಅನುಮಾನ ವ್ಯಕ್ತವಾಗಿದೆ. ರೈಲುಗಳು ಸಂಚರಿಸುವಾಗ ಉಂಟಾಗುವ ಕಂಪನಗಳು ಕಟ್ಟಡದ ದುರ್ಬಲತೆಯನ್ನು ಹೆಚ್ಚಿಸಿರಬಹುದು ಎಂದು MCD ತನ್ನ ವರದಿಯಲ್ಲಿ ಸಾಧ್ಯತೆಯ ಅಂಶವಾಗಿ ಉಲ್ಲೇಖಿಸಿದೆ.
ಸ್ಥಳೀಯ ನಿವಾಸಿಗಳ ಪ್ರಕಾರ, ಹಲವು ವರ್ಷಗಳಿಂದ ಕಟ್ಟಡದ ಗೋಡೆಗಳಲ್ಲಿ ಬಿರುಕುಗಳು ಕಾಣಿಸಿಕೊಂಡಿದ್ದವು. ಕಟ್ಟಡದ ಸ್ಥಿತಿ ಮತ್ತು ನಿರ್ಮಾಣದಲ್ಲಿ ಬಳಸಿರುವ ವಸ್ತುಗಳ ಗುಣಮಟ್ಟದ ಬಗ್ಗೆ ಹಿಂದೆಯೇ ಮಾಲೀಕರು ಹಾಗೂ ಸಂಬಂಧಪಟ್ಟವರಿಗೆ ಎಚ್ಚರಿಕೆ ನೀಡಲಾಗಿತ್ತು. ಆದರೂ ಸೂಕ್ತ ಕ್ರಮ ಕೈಗೊಳ್ಳಲಾಗಿಲ್ಲ ಎಂಬ ಆರೋಪ ಕೇಳಿಬಂದಿದೆ.
ಆದರೆ ರೈಲುಗಳ ಕಂಪನವೇ ಕಟ್ಟಡ ಕುಸಿತಕ್ಕೆ ನೇರ ಕಾರಣ ಎಂಬುದು ಇನ್ನೂ ದೃಢಪಟ್ಟಿಲ್ಲ. ಘಟನೆಗೆ ನಿಖರ ಕಾರಣ ತಿಳಿಯಲು ತನಿಖೆ ನಡೆಯುತ್ತಿದೆ.
ಕಟ್ಟಡ ಮಾಲೀಕನ ಬಂಧನ
ಕಟ್ಟಡ ಕುಸಿತ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಕಟ್ಟಡದ ಮಾಲೀಕ ಸುರೇಂದ್ರ ಸಿಂಗ್ (45) ಅವರನ್ನು ಬಂಧಿಸಿದ್ದಾರೆ. ಅವರ ಸಹೋದರನಿಗಾಗಿ ಹುಡುಕಾಟ ಮುಂದುವರಿದಿದೆ. ಕಟ್ಟಡದ ನಿರ್ಮಾಣ, ನಿರ್ವಹಣೆ ಮತ್ತು ಸುರಕ್ಷತಾ ನಿಯಮಗಳ ಉಲ್ಲಂಘನೆ ಕುರಿತು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ರೈಲ್ವೆ ಇಲಾಖೆಯ ಜಾಗದಲ್ಲಿ ಅತಿಕ್ರಮಣ ನಡೆದಿದೆಯೇ ಎಂಬುದರ ಬಗ್ಗೆಯೂ ಪರಿಶೀಲನೆ ನಡೆಯುತ್ತಿದೆ. ಕಟ್ಟಡವು ರೈಲ್ವೆ ಇಲಾಖೆಯ ಜಾಗದಲ್ಲಿದೆ ಎಂದು MCD ವರದಿ ತಿಳಿಸಿದ್ದರೆ, ಸ್ಥಳೀಯ ನಿವಾಸಿಗಳು ಆ ಜಾಗ ಖಾಸಗಿ ಒಡೆತನದಲ್ಲಿದೆ ಎಂದು ಪ್ರತಿಪಾದಿಸಿದ್ದಾರೆ.
ಇತರ ಕಟ್ಟಡಗಳ ಸುರಕ್ಷತೆಯ ಬಗ್ಗೆಯೂ ಆತಂಕ
ಜ್ವಾಲಾ ನಗರದಲ್ಲಿ ನಡೆದ ದುರಂತದ ಬಳಿಕ ರೈಲ್ವೆ ಹಳಿ ಸುತ್ತಮುತ್ತಲಿನ ಇತರ ಕಟ್ಟಡಗಳ ಸುರಕ್ಷತೆಯ ಬಗ್ಗೆಯೂ ಆತಂಕ ವ್ಯಕ್ತವಾಗಿದೆ. ಈ ಪ್ರದೇಶದಲ್ಲಿ ನೂರಾರು ಮನೆಗಳು ನಿರ್ಮಾಣವಾಗಿದ್ದು, ಕೆಲವು ಕಟ್ಟಡಗಳು ಶಿಥಿಲಾವಸ್ಥೆಯಲ್ಲಿವೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.
ಈ ಹಿನ್ನೆಲೆಯಲ್ಲಿ ಅಧಿಕಾರಿಗಳು ರೈಲ್ವೆ ಹಳಿ ಸಮೀಪದ ಆಸ್ತಿಗಳ ಮಾಲೀಕತ್ವ ಪರಿಶೀಲನೆ ನಡೆಸಬೇಕು ಮತ್ತು ಅಪಾಯಕಾರಿ ಕಟ್ಟಡಗಳನ್ನು ಗುರುತಿಸಿ ಅಗತ್ಯ ಕ್ರಮ ಕೈಗೊಳ್ಳಬೇಕು ಎಂಬ ಸೂಚನೆ ನೀಡಿದ್ದಾರೆ.
ಇತ್ತೀಚಿನ ದಿನಗಳಲ್ಲಿ ದೆಹಲಿಯಲ್ಲಿ ಕಟ್ಟಡ ಕುಸಿತದ ಘಟನೆಗಳು ಹೆಚ್ಚಾಗಿರುವುದು ಮತ್ತಷ್ಟು ಕಳವಳಕ್ಕೆ ಕಾರಣವಾಗಿದೆ. ನವೆಂಬರ್ 5ರಂದು ಹಳೆಯ ದೆಹಲಿಯ ಹೌಜ್ ಖಾಜಿ ಪ್ರದೇಶದಲ್ಲಿ ಕಟ್ಟಡ ಕುಸಿದು ಏಳು ಮಂದಿ ಮೃತಪಟ್ಟಿದ್ದರು. ಇದಕ್ಕೂ ಮೊದಲು ಸೆಪ್ಟೆಂಬರ್ನಲ್ಲಿ ಸತ್ಯ ನಿಕೇತನ ಪ್ರದೇಶದಲ್ಲಿ ಕಟ್ಟಡ ಕುಸಿದು ಏಳು ಮಂದಿ ಪ್ರಾಣ ಕಳೆದುಕೊಂಡಿದ್ದರು.
ಕಟ್ಟಡ ಸುರಕ್ಷತಾ ಪರಿಶೀಲನೆಗೆ ಒತ್ತಾಯ
ದೆಹಲಿಯಲ್ಲಿ ಹಳೆಯ ಮತ್ತು ಶಿಥಿಲಗೊಂಡ ಕಟ್ಟಡಗಳ ಸಮಗ್ರ ಪರಿಶೀಲನೆ ನಡೆಸುವ ಅಗತ್ಯ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ. ಕಟ್ಟಡಗಳ ಗೋಡೆಗಳಲ್ಲಿನ ಬಿರುಕುಗಳು, ದುರ್ಬಲ ಅಡಿಪಾಯ, ಹಳೆಯ ಮೇಲ್ಛಾವಣಿ ಮತ್ತು ಅನಧಿಕೃತ ನಿರ್ಮಾಣಗಳ ಬಗ್ಗೆ ಅಧಿಕಾರಿಗಳು ನಿರಂತರ ನಿಗಾ ವಹಿಸಬೇಕೆಂಬ ಒತ್ತಾಯ ಕೇಳಿಬಂದಿದೆ.
ದೆಹಲಿ ಮುಖ್ಯಮಂತ್ರಿ ರೇಖಾ ಗುಪ್ತಾ ಘಟನೆಗೆ ಸಂತಾಪ ವ್ಯಕ್ತಪಡಿಸಿದ್ದು, ಗಾಯಾಳುಗಳಿಗೆ ಸೂಕ್ತ ಚಿಕಿತ್ಸೆ ಒದಗಿಸುವಂತೆ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ. ಮೃತರ ಕುಟುಂಬಗಳಿಗೆ ಸರ್ಕಾರ ಅಗತ್ಯ ನೆರವು ನೀಡಲಿದೆ ಎಂದು ಭರವಸೆ ನೀಡಿದ್ದಾರೆ.

