ಬಣ್ಣದ ಲೋಕದಲ್ಲಿ ಒಂದು ಚಿತ್ರ ಯಶಸ್ವಿಯಾದರೆ, ಅದೇ ಗುಂಗಿನಲ್ಲಿ ಕನಿಷ್ಠ ಐದು ವರ್ಷವಾದರೂ(Five Years) ಉಸಿರಾಡಬಹುದೆಂದು ಸಿನಿಪಂಡಿತರು ಹೇಳಿದ್ದಾರೆ. 2026 ವರ್ಷದಲ್ಲಿ ಹಿಟ್ ಚಿತ್ರ ಯಾವುದು ಇಲ್ಲವೆಂಬ ಕೊರಗು ಕಾಡುತ್ತಿರುವಾಗಲೇ, ’ಪ್ರೇಮದ ಊರಲಿ’(Premada Urali) ಸಿನಿಮಾವು ಪ್ರೇಕ್ಷಕ ಮಹಾಪ್ರಭುಗಳಿಂದ ಮೆಚ್ಚುಗೆ ಗಳಿಸಿ, ಈ ಸಾಲಿನ ಮೊದಲ ಹಿಟ್ ಸಿನಿಮಾ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ರಂಗಾಯಣ ರಘು ಹೊರತುಪಡಿಸಿ ಚಿತ್ರದಲ್ಲಿ ನಟಿಸಿದ ಎಲ್ಲಾ ಕಲಾವಿದರು, ತಂತ್ರಜ್ಞರುಗಳಿಗೆ ಬದುಕು ಸಿಕ್ಕಿದೆ. ಈ ನಿಟ್ಟಿನಲ್ಲಿ ವಸಂತಳಾಗಿ ಎಲ್ಲರ ಮನಗೆದ್ದ ರಮಿಕಾ ಶಿವು(Ramika Shivu) ಕೊನೆಯತನಕ ನಿಲ್ಲುತ್ತಾರೆ, ಕಾಡುತ್ತಾರೆ.
’ಪಾರು’ ಧಾರವಾಹಿಯ ಮೂಲಕ ಕಿರುತೆರೆ ಪ್ರವೇಶಿಸಿದ ಇವರು, ಮೂಲತ: ಮೈಸೂರಿನವರು. ನಟನೆಗೆ ಬರಲು ಅಪ್ಪ-ಅಮ್ಮನ ಪ್ರೋತ್ಸಾಹ ಇರುವುದರಿಂದ ಅಷ್ಟೇನು ಕಷ್ಟ ಅನಿಸಲಿಲ್ಲ. ತಾಯಿ ಗೃಹಿಣಿ. ಅಪ್ಪ ಹೋಟೆಲ್ ಉದ್ಯಮಿ. ನಟನೆಯೊಂದಿಗೆ ಡಿಗ್ರಿ ಮುಗಿಸಿ, ಕಲೆಯ ಬಗ್ಗೆ ಗಮನ ಹರಿಸಿದ್ದಾರೆ. ನಿರ್ದೇಶಕರು ’ಪ್ರೇಮದ ಊರಲಿ’ ಕಥೆ ಹೇಳಿ, ’ವಸಂತ’ ಪಾತ್ರದ ಚಿತ್ರಣ ನೀಡಿದ್ದರು. ನಿಜ ಹೇಳಬೇಕೆಂದರೆ ರಿಯಲ್ ಲೈಫ್‌ನಲ್ಲಿ ಹಾಗೆಯೇ ಇರುವುದರಿಂದ ರೀಲ್‌ದಲ್ಲೂ ನಟಿಸಲು ಸುಲಭವಾಯಿತು. ನಾನೇ ಕಂಠದಾನ ಮಾಡಿದ್ದರಿಂದ ಸಹಜತೆ ಬಂದಿದೆ ಎಂದು ನಿರ್ದೇಶಕರು ಹೇಳಿದ್ದು ಇಂದಿಗೂ ನೆನಪಿದೆ. ಇದು ನನ್ನ ವೃತ್ತಿ ಬದುಕಿಗೆ ತಿರುವು ನೀಡಿದೆ.
ಹೊಸದಾಗಿ ಚಿತ್ರರಂಗಕ್ಕೆ ಬರುವ ಪ್ರತಿಭೆಗಳಿಗೆ ಇಂತಹ ಸಾರಥಿಯೊಂದಿಗೆ ಕೆಲಸ ಸಿಕ್ಕರೆ ಪುಣ್ಯ ಎನ್ನಬಹುದು. ಭವಿಷ್ಯದಲ್ಲಿ ಮಾಡಬೇಕಾದ ರೋಲ್ ಬಗ್ಗೆ ನನ್ನದೆ ಆದೆ ದೃಷ್ಟಿಕೋನವಿದೆ. ವಿನೂತನ, ಸವಾಲು ಎನಿಸುವಂತಹ ಪಾತ್ರಗಳಿಗೆ ಆದ್ಯತೆ ನೀಡುತ್ತೇನೆ. ಕಥೆಗೆ ಅಗತ್ಯವೆನಿಸಿದರೆ ’ಬಬ್ಲಿಗರ್ಲ್’ ಆಗಲು ಅಭ್ಯಂತರವೇನಿಲ್ಲ. ಈಗಾಗಲೇ ಒಂದಷ್ಟು ಕರೆಗಳು ಬಂದಿವೆ, ಬರುತ್ತಲೂ ಇದೆ. ಸಿನಿಪಯಣದ ಮೆಟ್ಟಿಲುಗಳನ್ನು ಏರಬೇಕು. ಅದಕ್ಕಾಗಿ ಜತನದಿಂದ ಕಥೆಗಳನ್ನು ಆಯ್ದುಕೊಂಡು ಬೆಳ್ಳಿತೆರೆಯಲ್ಲೆ ನೆಲೆಯೂರುವ ಬಗ್ಗೆ ಚಿಂತನೆ ನಡೆಸಿದ್ದೇನೆ ಎನ್ನುತ್ತಾರೆ ರಮಿಕಾಶಿವು.