ನಾಗೋಯಾ: ಏಷ್ಯನ್ ಗೇಮ್ಸ್‌ (Asian Games) 2026ರ ಮಹಿಳೆಯರ 400 ಮೀಟರ್ ಹರ್ಡಲ್ಸ್‌ (Hurdles) ಸ್ಪರ್ಧೆಯಲ್ಲಿ ಭಾರತದ ಅಥ್ಲೀಟ್ ವಿಥ್ಯಾ ರಾಮರಾಜ್ (Mithya Ramaraj) ಕಂಚಿನ ಪದಕ ಗೆದ್ದು, ಭಾರತೀಯ ಅಥ್ಲೆಟಿಕ್ಸ್‌ನಲ್ಲಿ ಐತಿಹಾಸಿಕ ಸಾಧನೆ ಮಾಡಿದ್ದಾರೆ. 54.75 ಸೆಕೆಂಡ್‌ಗಳಲ್ಲಿ ಸ್ಪರ್ಧೆ ಪೂರ್ಣಗೊಳಿಸಿದ ಅವರು, ದಿಗ್ಗಜ ಅಥ್ಲೀಟ್ (Athlete) ಪಿ.ಟಿ. ಉಷಾ ಅವರ 42 ವರ್ಷಗಳ ರಾಷ್ಟ್ರೀಯ ದಾಖಲೆಯನ್ನು ಮುರಿದಿದ್ದಾರೆ.
1984ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್‌ನಲ್ಲಿ ಪಿ.ಟಿ. ಉಷಾ ಅವರು ದಾಖಲಿಸಿದ್ದ 55.42 ಸೆಕೆಂಡ್‌ಗಳ ರಾಷ್ಟ್ರೀಯ ದಾಖಲೆ ನಾಲ್ಕು ದಶಕಗಳಿಗೂ ಹೆಚ್ಚು ಕಾಲ ಉಳಿದಿತ್ತು. 2023ರ ಹ್ಯಾಂಗ್‌ಝೌ ಏಷ್ಯನ್ ಗೇಮ್ಸ್‌ನಲ್ಲಿ ವಿಥ್ಯಾ ಇದೇ 55.42 ಸೆಕೆಂಡ್‌ಗಳ ಸಮಯವನ್ನು ದಾಖಲಿಸಿ ಉಷಾ ಅವರ ದಾಖಲೆಯನ್ನು ಸರಿಗಟ್ಟಿದ್ದರು. ಇದೀಗ ನಾಗೋಯಾದಲ್ಲಿ 54.75 ಸೆಕೆಂಡ್‌ಗಳಲ್ಲಿ ಓಡಿ, ಆ ದಾಖಲೆಯನ್ನು 0.67 ಸೆಕೆಂಡ್‌ಗಳಿಂದ ಉತ್ತಮಪಡಿಸಿದ್ದಾರೆ.
ಫೈನಲ್‌ನಲ್ಲಿ ಯುಎಇಯ ಮರಿಯಂ ಕರೀಮ್ 54.31 ಸೆಕೆಂಡ್‌ಗಳಲ್ಲಿ ಚಿನ್ನದ ಪದಕ ಗೆದ್ದರೆ, ಕಜಕಿಸ್ತಾನದ ಅಡೆಲಿನಾ ಝೆಮ್ಸ್ 54.58 ಸೆಕೆಂಡ್‌ಗಳಲ್ಲಿ ಬೆಳ್ಳಿ ಪದಕ ಪಡೆದರು. ವಿಥ್ಯಾ ರಾಮರಾಜ್ 54.75 ಸೆಕೆಂಡ್‌ಗಳೊಂದಿಗೆ ಮೂರನೇ ಸ್ಥಾನ ಪಡೆದು ಕಂಚಿಗೆ ಮುತ್ತಿಟ್ಟರು. ಭಾರತದ ಮತ್ತೊಬ್ಬ ಸ್ಪರ್ಧಿ ಅನು ರಾಘವನ್ 55.88 ಸೆಕೆಂಡ್‌ಗಳಲ್ಲಿ ಐದನೇ ಸ್ಥಾನ ಪಡೆದರು.
ವಿಥ್ಯಾ ಅವರ ಈ ಸಾಧನೆ ವಿಶೇಷವಾಗಿರುವುದಕ್ಕೆ ಮತ್ತೊಂದು ಕಾರಣವೆಂದರೆ, ಇದೇ ಏಷ್ಯನ್ ಗೇಮ್ಸ್‌ನಲ್ಲಿ ಅವರು ಮಿಶ್ರ 4×400 ಮೀಟರ್ ರಿಲೇಯಲ್ಲೂ ಭಾರತಕ್ಕೆ ಬೆಳ್ಳಿ ಪದಕ ಗೆಲ್ಲಲು ನೆರವಾಗಿದ್ದರು.
ವಿಥ್ಯಾ ಅವರ ದಾಖಲೆ ಮುರಿದ ಸಾಧನೆಗೆ ಪಿ.ಟಿ. ಉಷಾ ಕೂಡ ಅಭಿನಂದನೆ ಸಲ್ಲಿಸಿದ್ದಾರೆ. ದಶಕಗಳ ಕಾಲ ಉಳಿದಿದ್ದ ದಾಖಲೆಯನ್ನು ಮುಂದಿನ ಪೀಳಿಗೆಯ ಕ್ರೀಡಾಪಟು ಮುರಿದಿರುವುದು ಹೆಮ್ಮೆಯ ಕ್ಷಣ ಎಂದು ಉಷಾ ಪ್ರತಿಕ್ರಿಯಿಸಿದ್ದಾರೆ.
54.75 ಸೆಕೆಂಡ್‌ಗಳ ಓಟದ ಮೂಲಕ ವಿಥ್ಯಾ ರಾಮರಾಜ್ ಹೊಸ ರಾಷ್ಟ್ರೀಯ ದಾಖಲೆ ನಿರ್ಮಿಸಿದ್ದು, ಏಷ್ಯನ್ ಗೇಮ್ಸ್‌ನಲ್ಲಿ ಭಾರತಕ್ಕೆ ಮತ್ತೊಂದು ಅಥ್ಲೆಟಿಕ್ಸ್ ಪದಕ ತಂದುಕೊಟ್ಟಿದ್ದಾರೆ.