ಕೀವ್: ರಷ್ಯಾ–ಉಕ್ರೇನ್(Rassia Ukrane) ಯುದ್ಧಕ್ಕೆ ಕದನ ವಿರಾಮದ ಸಾಧ್ಯತೆ ಕುರಿತು ಉಕ್ರೇನ್‌ಗೆ ಭಾರತ, ಅಮೆರಿಕ, ಟರ್ಕಿ ಮತ್ತು ಈಜಿಪ್ಟ್‌ನಿಂದ ನಾಲ್ಕು ಪ್ರಸ್ತಾವನೆಗಳು ಬಂದಿವೆ. ಈ ನಾಲ್ಕರಲ್ಲಿ ಭಾರತದ ಪ್ರಸ್ತಾವನೆ “ಅತ್ಯಂತ ವ್ಯಾಪಕವಾದದ್ದು” ಎಂದು ಉಕ್ರೇನ್ ವಿದೇಶಾಂಗ ಸಚಿವ ಆಂದ್ರಿ ಸಿಬಿಹಾ ಹೇಳಿದ್ದಾರೆ.
ಭಾರತದ ಪ್ರಸ್ತಾವನೆಯು ಇಂಧನ ಕ್ಷೇತ್ರದ ಮೇಲಿನ ದಾಳಿಗಳನ್ನು ನಿಲ್ಲಿಸುವುದರ ಜೊತೆಗೆ ಕಪ್ಪು ಸಮುದ್ರದಲ್ಲಿ ಕದನ ವಿರಾಮ ಜಾರಿಗೊಳಿಸುವುದನ್ನು ಒಳಗೊಂಡಿದೆ. ಬಂದರುಗಳು ಸೇರಿದಂತೆ ಇಂಧನ ಮೂಲಸೌಕರ್ಯಗಳ ಮೇಲಿನ ದಾಳಿಗಳನ್ನೂ ಸಂಪೂರ್ಣವಾಗಿ ಸ್ಥಗಿತಗೊಳಿಸುವುದು ಇದರ ಪ್ರಮುಖ ಅಂಶವಾಗಿದೆ.
ಟರ್ಕಿ ಮತ್ತು ಈಜಿಪ್ಟ್ ಮುಂದಿಟ್ಟಿರುವ ಪ್ರಸ್ತಾವನೆಗಳು ಮುಖ್ಯವಾಗಿ ಕಪ್ಪು ಸಮುದ್ರದಲ್ಲಿ ಕದನ ವಿರಾಮ ಜಾರಿಗೊಳಿಸಿ, ಉಕ್ರೇನ್‌ನ ಧಾನ್ಯ ರಫ್ತು ಪುನರಾರಂಭಿಸಲು ಅನುಕೂಲ ಮಾಡಿಕೊಡುವುದರ ಮೇಲೆ ಕೇಂದ್ರೀಕೃತವಾಗಿವೆ. ಮತ್ತೊಂದೆಡೆ, ಅಮೆರಿಕದ ಪ್ರಸ್ತಾವನೆಯು ರಷ್ಯಾ ಮತ್ತು ಉಕ್ರೇನ್ ನಡುವೆ ಇಂಧನ ಮೂಲಸೌಕರ್ಯಗಳ ಮೇಲಿನ ದಾಳಿಗಳನ್ನು ನಿಲ್ಲಿಸುವುದಕ್ಕೆ ಒತ್ತು ನೀಡಿದೆ.
ಉಕ್ರೇನ್ ಕೂಡ ವಿವಿಧ ರೀತಿಯ ಕದನ ವಿರಾಮ ಆಯ್ಕೆಗಳನ್ನು ಪರಿಗಣಿಸಲು ಸಿದ್ಧವಿದೆ ಎಂದು ಸಿಬಿಹಾ ತಿಳಿಸಿದ್ದಾರೆ. ಇಂಧನ ಮತ್ತು ಬಂದರು ಮೂಲಸೌಕರ್ಯಗಳ ಮೇಲಿನ ದಾಳಿಗಳ ನಿಲುಗಡೆಯೊಂದಿಗೆ ಕಪ್ಪು ಸಮುದ್ರದಲ್ಲಿ ಕದನ ವಿರಾಮವೂ ಇರಬೇಕು ಎಂಬುದು ಕೀವ್‌ನ ಪ್ರಮುಖ ಬೇಡಿಕೆಯಾಗಿದೆ. ಜೊತೆಗೆ, ಸಂಪರ್ಕ ರೇಖೆಯುದ್ದಕ್ಕೂ ಯಾವುದೇ ಷರತ್ತಿಲ್ಲದ ಕದನ ವಿರಾಮದ ಸಾಧ್ಯತೆಯನ್ನೂ ಉಕ್ರೇನ್ ಪರಿಗಣಿಸುತ್ತಿದೆ.
ಈ ಬೆಳವಣಿಗೆಯ ನಡುವೆ, ರಷ್ಯಾ–ಉಕ್ರೇನ್ ಸಂಘರ್ಷಕ್ಕೆ ರಾಜತಾಂತ್ರಿಕ ಪರಿಹಾರ ಕಂಡುಕೊಳ್ಳುವ ಪ್ರಯತ್ನಗಳಲ್ಲಿ ಭಾರತದ ಪಾತ್ರದ ಕುರಿತು ಗಮನ ಹೆಚ್ಚಾಗಿದೆ. ಸಿಬಿಹಾ ಅವರ ಹೇಳಿಕೆಯ ಪ್ರಕಾರ, ಭಾರತ ಇದೇ ಮೊದಲ ಬಾರಿಗೆ ಈ ಪ್ರಕ್ರಿಯೆಯಲ್ಲಿ ಸಕ್ರಿಯ ಮಧ್ಯಸ್ಥಿಕೆಯ ಪಾತ್ರ ವಹಿಸಲು ಸಿದ್ಧತೆಯನ್ನು ಸೂಚಿಸಿದೆ.
ಮುಂದಿನ ಹಂತದಲ್ಲಿ ರಷ್ಯಾ ಮತ್ತು ಉಕ್ರೇನ್ ಎರಡೂ ಯಾವ ಪ್ರಸ್ತಾವನೆಗೆ ಒಪ್ಪಿಗೆ ನೀಡುತ್ತವೆ ಎಂಬುದು ಕದನ ವಿರಾಮದ ಪ್ರಯತ್ನಗಳ ದಿಕ್ಕನ್ನು ನಿರ್ಧರಿಸಲಿದೆ. ಪ್ರಸ್ತುತ ನಾಲ್ಕು ಪ್ರಸ್ತಾವನೆಗಳ ಕುರಿತು ಚರ್ಚೆ ಮುಂದುವರಿದಿದ್ದು, ಯಾವುದೇ ಅಂತಿಮ ಒಪ್ಪಂದ ಇನ್ನೂ ಪ್ರಕಟವಾಗಿಲ್ಲ.