ಬೆಂಗಳೂರು: ದೇಶದ ವಿವಿಧ ಭಾಗಗಳಿಂದ ಆಗಮಿಸಿದ ಕರಾಟೆ ಪಟುಗಳು, ತರಬೇತುದಾರರು, ತೀರ್ಪುಗಾರರನ್ನು ಒಂದೇ ವೇದಿಕೆಯಲ್ಲಿ ಒಗ್ಗೂಡಿಸಿದ ‘ಗ್ರ್ಯಾಂಡ್ ಕಪ್ – ಆಲ್ ಇಂಡಿಯಾ ಓಪನ್ ಕರಾಟೆ ಚಾಂಪಿಯನ್ಷಿಪ್ 2026’(Grand Cup-All India Open Karate Champianship 2026) ಬೆಂಗಳೂರಿನ ಕೋರಮಂಗಲದ ಇಂಡೋರ್ ಸ್ಟೇಡಿಯಂನಲ್ಲಿ(Indore Statium) ಯಶಸ್ವಿಯಾಗಿ ನಡೆಯಿತು.
ಸುಡೋಕನ್ ಮಾರ್ಷಲ್ ಆರ್ಟ್ಸ್ನ ಶಿಹಾನ್ ಜ಼ೈನ್ ಹಾಗೂ ಎ.ಝೆಡ್. ಮಾರ್ಷಲ್ ಆರ್ಟ್ಸ್ ಅಕಾಡೆಮಿಯ ಶಿಹಾನ್ ಎ.ಝೆಡ್. ಮುಹೀಬ್ ಅವರ ನೇತೃತ್ವದಲ್ಲಿ ಆಯೋಜಿಸಲಾದ ಈ ರಾಷ್ಟ್ರೀಯ ಮಟ್ಟದ ಚಾಂಪಿಯನ್ಶಿಪ್, ಭಾರತದ ವಿವಿಧ ಭಾಗಗಳ ಯುವ ಕರಾಟೆ ಪಟುಗಳಿಗೆ ತಮ್ಮ ಕೌಶಲ, ಶಿಸ್ತು, ಆತ್ಮವಿಶ್ವಾಸ ಹಾಗೂ ಸ್ಪರ್ಧಾತ್ಮಕ ಮನೋಭಾವವನ್ನು ಪ್ರದರ್ಶಿಸಲು ಅತ್ಯುತ್ತಮ ವೇದಿಕೆಯನ್ನು ಒದಗಿಸಿತು.
ಕಾರ್ಯಕ್ರಮಕ್ಕೆ ವಿಧಾನ ಪರಿಷತ್ ಸದಸ್ಯರಾದ ರಾಮೋಜಿ ಗೌಡ ಅವರು ಮುಖ್ಯ ಅತಿಥಿಗಳಾಗಿ ಆಗಮಿಸಿ, ಸ್ಪರ್ಧಿಗಳಿಗೆ ಶುಭ ಹಾರೈಸಿದರು. ಕ್ರೀಡೆ ಹಾಗೂ ಸಮರಕಲೆಗಳು ಯುವಜನರಲ್ಲಿ ಶಿಸ್ತು, ಆತ್ಮವಿಶ್ವಾಸ ಮತ್ತು ನಾಯಕತ್ವದ ಗುಣಗಳನ್ನು ಬೆಳೆಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತವೆ ಎಂದು ಅವರು ತಿಳಿಸಿ, ಯುವ ಕ್ರೀಡಾಪಟುಗಳು ನಿರಂತರ ಪರಿಶ್ರಮದ ಮೂಲಕ ಅಂತಾರಾಷ್ಟ್ರೀಯ ಮಟ್ಟದಲ್ಲಿಯೂ ಸಾಧನೆ ಮಾಡುವಂತೆ ಪ್ರೋತ್ಸಾಹಿಸಿದರು.
ಚಾಂಪಿಯನ್ಷಿಪ್ನಲ್ಲಿ ವಿವಿಧ ವಯೋಮಾನದ ಹಾಗೂ ಬೆಲ್ಟ್ ವಿಭಾಗಗಳಲ್ಲಿ ಕಾಟಾ, ಕುಮಿಟೆ ಮತ್ತು ಟೀಮ್ ಕಾಟಾ ಸ್ಪರ್ಧೆಗಳು ನಡೆದವು. ದೇಶದ ನಾನಾ ಶಾಲಾ-ಕಾಲೇಜುಗಳು, ಕರಾಟೆ ಅಕಾಡೆಮಿಗಳು ಹಾಗೂ ಕ್ರೀಡಾ ಸಂಸ್ಥೆಗಳಿಂದ ಆಗಮಿಸಿದ ನೂರಾರು ಸ್ಪರ್ಧಿಗಳು ಉತ್ಸಾಹದಿಂದ ಭಾಗವಹಿಸಿ, ತಮ್ಮ ಅತ್ಯುತ್ತಮ ಪ್ರದರ್ಶನ ನೀಡಿದರು.
ಪಂದ್ಯಾವಳಿಯುದ್ದಕ್ಕೂ ಸ್ಪರ್ಧಿಗಳ ನಡುವಿನ ತೀವ್ರ ಪೈಪೋಟಿ, ಶಿಸ್ತುಬದ್ಧ ಪ್ರದರ್ಶನ ಹಾಗೂ ಕ್ರೀಡಾ ಸ್ಫೂರ್ತಿ ಗಮನ ಸೆಳೆಯಿತು. ಉದಯೋನ್ಮುಖ ಪ್ರತಿಭೆಗಳಿಗೆ ಸ್ಪರ್ಧಾತ್ಮಕ ಅನುಭವ ನೀಡುವುದರ ಜೊತೆಗೆ, ಮುಂದಿನ ಹಂತದ ಕ್ರೀಡಾ ಸಾಧನೆಗೆ ಅಗತ್ಯವಾದ ಆತ್ಮವಿಶ್ವಾಸವನ್ನು ಬೆಳೆಸುವಲ್ಲಿ ಚಾಂಪಿಯನ್ಶಿಪ್ ಮಹತ್ವದ ಪಾತ್ರ ವಹಿಸಿತು.
ಚಾಂಪಿಯನ್ಷಿಪ್ನ ಯಶಸ್ವಿ ಆಯೋಜನೆಗೆ ಶ್ರಮಿಸಿದ ತೀರ್ಪುಗಾರರು, ಕೋಚ್ಗಳು, ತಾಂತ್ರಿಕ ಅಧಿಕಾರಿಗಳು, ಸ್ವಯಂಸೇವಕರು ಹಾಗೂ ಸಂಘಟನಾ ತಂಡದ ಕಾರ್ಯವನ್ನು ಆಯೋಜಕರು ಶ್ಲಾಘಿಸಿದರು. ಕಾರ್ಯಕ್ರಮಕ್ಕೆ ನಿರಂತರ ಬೆಂಬಲ ಹಾಗೂ ಮಾರ್ಗದರ್ಶನ ನೀಡಿದ ಅಖಿಲ ಕರ್ನಾಟಕ ಸ್ಪೋರ್ಟ್ಸ್ ಕರಾಟೆ ಅಸೋಸಿಯೇಷನ್ ಅಧ್ಯಕ್ಷರಾದ ಶ್ರೀ ಅರುಣ್ ಮಾಚಯ್ಯ ಹಾಗೂ ಪ್ರಧಾನ ಕಾರ್ಯದರ್ಶಿ ಶ್ರೀ ಭಾರ್ಗವ್ ರೆಡ್ಡಿ ಅವರಿಗೆ ಸಂಘಟಕರು ವಿಶೇಷ ಕೃತಜ್ಞತೆ ಸಲ್ಲಿಸಿದರು.
ಗ್ರ್ಯಾಂಡ್ ಕಪ್ 2026, ಸ್ಪರ್ಧೆಯ ವೇದಿಕೆಯನ್ನು ಮೀರಿಸಿ ಭಾರತದ ಯುವ ಕರಾಟೆ ಪ್ರತಿಭೆಗಳಿಗೆ ತಮ್ಮ ಸಾಮರ್ಥ್ಯವನ್ನು ಪ್ರದರ್ಶಿಸಲು, ಅನುಭವ ಪಡೆಯಲು ಹಾಗೂ ಮುಂದಿನ ದೊಡ್ಡ ಗುರಿಗಳತ್ತ ಹೆಜ್ಜೆ ಇಡಲು ಪ್ರೇರಣೆ ನೀಡಿದ ಮಹತ್ವದ ಕ್ರೀಡಾಕೂಟವಾಗಿ ಇದು ಮೂಡಿಬಂತು.