ಬೆಂಗಳೂರು: ಸಾವರ್ಕರ್‌ ಸಾಹಿತ್ಯ ಸಂಘದ ನೂತನ ಅಧ್ಯಕ್ಷರಾಗಿ ಸಂಸ್ಕೃತ ವಿದ್ವಾಂಸರು, ಚಲನಚಿತ್ರ ನಿರ್ಮಾಪಕರು, ಲೇಖಕರು, ವಿಧಾನ ಪರಿಷತ್‌ ಮಾಜಿ ಸದಸ್ಯರು ಆದ ಡಾ. ಎಸ್‌. ಆರ್‌. ಲೀಲಾ(Dr.S.R.Leela) ಅವರು ಆಯ್ಕೆಯಾಗಿದ್ದಾರೆ. ಶನಿವಾರ ನಡೆದ ಟ್ರಸ್ಟಿನ ಸಭೆಯಲ್ಲಿ ನಿರ್ಗಮಿತ ಅಧ್ಯಕ್ಷ ಡಾ. ಜಿ.ಬಿ. ಹರೀಶ(Dr.G.B.Hareesha) ಅವರು ನೂತನ ಅಧ್ಯಕ್ಷರಿಗೆ ಧ್ವಜವನ್ನು ನೀಡುವ ಮೂಲಕ ಅಧಿಕಾರವನ್ನು ಹಸ್ತಾಂತರಿಸಿದರು. ಇದೇ ವೇಳೆ ಟ್ರಸ್ಟ್‌ಗೆ ನೂತನವಾಗಿ ಶ್ರೀಮತಿ ಮಂಜು, ಶ್ರೀ ರಮಾನಂದ್‌ ಎನ್‌.ಎಸ್‌., ಶ್ರೀ ರಮೇಶ ಪಿ.ಎಂ. ಅವರನ್ನು ಸೇರ್ಪಡೆ ಮಾಡಲಾಯಿತು. ಡಾ. ಜಿ.ಬಿ. ಹರೀಶ ಅವರು ಟ್ರಸ್ಟಿಯಾಗಿ ಮುಂದುವರಿಯಲಿದ್ದಾರೆ. ಸಭೆಯಲ್ಲಿ ಟ್ರಸ್ಟಿ ಡಾ. ಹರ್ಷ(Dr.Harsha) ಸಮೃದ್ಧ ಉಪಸ್ಥಿತರಿದ್ದರು.
ಈ ಸಂದರ್ಭದಲ್ಲಿ ಮಾತನಾಡಿದ ಡಾ. ಎಸ್‌.ಆರ್‌. ಲೀಲಾ ಅವರು, ಸಾತಂತ್ರ್ಯವೀರ ವಿನಾಯಕ ದಾಮೋದರ ಸಾವರ್ಕರ್‌ ಅವರ ವಿಚಾರವನ್ನು ಪ್ರಚುರಗೊಳಿಸುವ ನಿಟ್ಟಿನಲ್ಲಿ ಟ್ರಸ್ಟ್‌ ಅನನ್ಯ ಕಾರ್ಯ ಮಾಡುತ್ತಿದೆ. ಸಾವರ್ಕರ್‌ ಅವರ ಸಮಗ್ರ ಕಾವ್ಯದ ಕನ್ನಡಾನುವಾದದ ಅಗಾಧ ಕಾರ್ಯದ ಜೊತೆಗೆ ಸಾಕಷ್ಟು ಸಾಹಿತ್ಯಿಕ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡಿದೆ. ಟ್ರಸ್ಟ್‌ನ ಧ್ಯೇಯೋದ್ದೇಶಗಳಿಗೆ ಅನುಗುಣವಾಗಿ ಮುಂದಿನ ದಿನಗಳಲ್ಲೂ ನೂತನ ಯೋಜನೆಗಳನ್ನು ಹಮ್ಮಿಕೊಳ್ಳಲಾಗುತ್ತದೆ ಎಂದರು.