ಈಜುಕೊಳಗಳಲ್ಲಿ (Swimming Pool) ವಿದ್ಯುತ್ ಸುರಕ್ಷತೆ ಅತ್ಯಂತ ಮಹತ್ವದ ವಿಷಯವಾಗಿದೆ. ಈಜುಕೊಳದ ನೀರಿನಲ್ಲಿ ವಿದ್ಯುತ್ ಸೋರಿಕೆಯಾದರೆ ಈಜಾಡುವವರಿಗೆ ವಿದ್ಯುತ್ ಆಘಾತ ಉಂಟಾಗಿ ಪ್ರಾಣಾಪಾಯ ಸಂಭವಿಸಬಹುದು. ಇತ್ತೀಚೆಗೆ ಬೆಂಗಳೂರಿನ ಐಷಾರಾಮಿ ಹೋಟೆಲ್‌ನ (STAR Hotels) ಈಜುಕೊಳದಲ್ಲಿ ವಿದ್ಯುತ್ ಆಘಾತದಿಂದ ವಿದೇಶಿ ಪ್ರಜೆಗಳು (Foreigner Died) ಮೃತಪಟ್ಟ ಘಟನೆ ಇಂತಹ ಅಪಾಯಗಳ ಬಗ್ಗೆ ಮತ್ತೊಮ್ಮೆ ಆತಂಕ ಮೂಡಿಸಿದೆ.
ಭಾರತದಲ್ಲಿ ಈಜುಕೊಳಗಳ ವಿದ್ಯುತ್ ವ್ಯವಸ್ಥೆಗೆ ಸಂಬಂಧಿಸಿದಂತೆ ಭಾರತೀಯ ಮಾನಕಗಳ ಬ್ಯೂರೋ (BIS) ಮತ್ತು ವಿದ್ಯುತ್ ಸುರಕ್ಷತಾ ನಿಯಮಗಳು ಹಲವು ಮುನ್ನೆಚ್ಚರಿಕೆ ಕ್ರಮಗಳನ್ನು ಸೂಚಿಸುತ್ತವೆ. ಈ ನಿಯಮಗಳ ಮುಖ್ಯ ಉದ್ದೇಶ ನೀರು, ಈಜುಗಾರರು ಮತ್ತು ವಿದ್ಯುತ್ ಉಪಕರಣಗಳ ನಡುವಿನ ಅಪಾಯಕಾರಿ ಸಂಪರ್ಕವನ್ನು ತಡೆಯುವುದಾಗಿದೆ.
ಈಜುಕೊಳಗಳ ವಿದ್ಯುತ್ ಸುರಕ್ಷತೆಗೆ ಪ್ರಮುಖ 6 ನಿಯಮಗಳು
1. 12 ವೋಲ್ಟ್ ನೀರೊಳಗಿನ ದೀಪಗಳು: ಈಜುಕೊಳದ ನೀರಿನೊಳಗೆ ಅಳವಡಿಸುವ ದೀಪಗಳಿಗೆ 12V SELV (Safety Extra Low Voltage) ವಿದ್ಯುತ್ ಪೂರೈಕೆಯನ್ನು ಬಳಸಬೇಕು.
2. 30 ಮಿಲಿಆಂಪಿಯರ್ RCD ವ್ಯವಸ್ಥೆ: ವಿದ್ಯುತ್ ಸೋರಿಕೆಯನ್ನು ಪತ್ತೆಹಚ್ಚಿ ತಕ್ಷಣ ವಿದ್ಯುತ್ ಸಂಪರ್ಕ ಕಡಿತಗೊಳಿಸುವ RCD ಅಥವಾ RCCB ಸುರಕ್ಷತಾ ಸಾಧನಗಳನ್ನು ಅಳವಡಿಸಬೇಕು.
3. ಜಲನಿರೋಧಕ ವಿದ್ಯುತ್ ಸಾಕೆಟ್‌ಗಳು: ಈಜುಕೊಳದ ಸುತ್ತಮುತ್ತಲಿನ ವಿದ್ಯುತ್ ಸಾಕೆಟ್‌ಗಳಿಗೆ ವಾಟರ್‌ಪ್ರೂಫ್ ಕವರ್ ಹಾಗೂ ವಿದ್ಯುತ್ ಸೋರಿಕೆ ತಡೆ ಸಾಧನ ಇರಬೇಕು.
4. ಸರಿಯಾದ ಅರ್ಥಿಂಗ್ ವ್ಯವಸ್ಥೆ: ಈಜುಕೊಳದಲ್ಲಿರುವ ಲೋಹದ ರೇಲಿಂಗ್, ಮೆಟ್ಟಿಲು, ಹ್ಯಾಂಡ್‌ರೈಲ್ ಸೇರಿದಂತೆ ಲೋಹದ ಭಾಗಗಳಿಗೆ ಸೂಕ್ತ ಅರ್ಥಿಂಗ್ ವ್ಯವಸ್ಥೆ ಕಲ್ಪಿಸಬೇಕು.
5. ವಿದ್ಯುತ್ ಸ್ವಿಚ್‌ಗಳಿಗೆ ನಿರ್ಬಂಧ: ಈಜುಕೊಳದ ನೀರೊಳಗಿನ ದೀಪಗಳ ಸ್ವಿಚ್‌ಗಳು ಮತ್ತು ನಿಯಂತ್ರಣ ವ್ಯವಸ್ಥೆಗಳು ಸಾರ್ವಜನಿಕರ ನೇರ ಬಳಕೆಗೆ ಸಿಗದಂತೆ ಸುರಕ್ಷಿತ ಸ್ಥಳದಲ್ಲಿರಬೇಕು.
6. ನಿಯಮಿತ ತಪಾಸಣೆ: ಈಜುಕೊಳದ ವಿದ್ಯುತ್ ವೈರಿಂಗ್, ದೀಪಗಳು, ಪಂಪ್‌ಗಳು ಮತ್ತು ಅರ್ಥಿಂಗ್ ವ್ಯವಸ್ಥೆಯನ್ನು ಅರ್ಹ ತಜ್ಞರಿಂದ ನಿಯಮಿತವಾಗಿ ಪರಿಶೀಲಿಸಬೇಕು.
ಈ ನಿಯಮಗಳು ಸಾರ್ವಜನಿಕ ಈಜುಕೊಳಗಳ ಸುರಕ್ಷತೆಗೆ ಸಂಬಂಧಿಸಿದ BIS ಮಾನದಂಡ IS 16508:2017ರಲ್ಲಿವೆ.
ಬೆಂಗಳೂರಿನ ಹೋಟೆಲ್ ದುರಂತದ ಹಿನ್ನೆಲೆಯಲ್ಲಿ ತನಿಖೆ
ಬೆಂಗಳೂರಿನ ಕಾನ್ರಾಡ್ ಹೋಟೆಲ್‌ನ ಈಜುಕೊಳದಲ್ಲಿ ವಿದ್ಯುತ್ ಆಘಾತದಿಂದ ಇಬ್ಬರು ವಿದೇಶಿ ಪ್ರಜೆಗಳು ಮೃತಪಟ್ಟ ಘಟನೆ ದೇಶಾದ್ಯಂತ ಚರ್ಚೆಗೆ ಕಾರಣವಾಗಿದೆ. ಜರ್ಮನ್ ಪ್ರಜೆ ಅಲೆಕ್ಸಾಂಡರ್ ಮ್ಯಾಕ್ಸಿಮಿಲಿಯನ್ ಥೀಸ್ ಮತ್ತು ಸ್ಲೊವಾಕ್ ಪ್ರಜೆ ಜುರಾಜ್ ಹೋರ್ವತ್ ಮೃತಪಟ್ಟವರು ಎಂದು ವರದಿಯಾಗಿದೆ.
ಈಜುಕೊಳದ ನೀರೊಳಗಿನ ದೀಪಗಳನ್ನು ಆನ್ ಮಾಡಿದ ಬಳಿಕ ವಿದ್ಯುತ್ ಸೋರಿಕೆ ಸಂಭವಿಸಿರಬಹುದು ಎಂಬ ಶಂಕೆ ವ್ಯಕ್ತವಾಗಿದೆ. ಆದರೆ ದುರಂತಕ್ಕೆ ನಿಖರ ಕಾರಣ ಇನ್ನೂ ತನಿಖೆಯಿಂದ ದೃಢಪಟ್ಟಿಲ್ಲ. ವೈರಿಂಗ್, ಅರ್ಥಿಂಗ್, ನೀರೊಳಗಿನ ದೀಪಗಳು ಮತ್ತು ವಿದ್ಯುತ್ ಸುರಕ್ಷತಾ ಸಾಧನಗಳ ಕಾರ್ಯನಿರ್ವಹಣೆಯನ್ನು ಪೊಲೀಸರು ಹಾಗೂ ವಿದ್ಯುತ್ ಇಲಾಖೆ ಪರಿಶೀಲಿಸುತ್ತಿವೆ.
ಈಜುಕೊಳಗಳಲ್ಲಿ ವಿದ್ಯುತ್ ಸುರಕ್ಷತೆಯ ನಿಯಮಗಳನ್ನು ಪಾಲಿಸುವುದು ಕೇವಲ ಕಾನೂನುಬದ್ಧ ಜವಾಬ್ದಾರಿಯಲ್ಲ; ಸಾರ್ವಜನಿಕರ ಜೀವ ರಕ್ಷಣೆಯ ದೃಷ್ಟಿಯಿಂದಲೂ ಅತ್ಯಗತ್ಯವಾಗಿದೆ.