ಬೆಂಗಳೂರು: ಪ್ರಯಾಣಿಕರ ಹಾಗೂ ಸಾರ್ವಜನಿಕರ ಅನುಕೂಲಕ್ಕಾಗಿ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮದ (KSRTC) ಬೆಂಗಳೂರು ಕೇಂದ್ರೀಯ ವಿಭಾಗವು ಬೆಂಗಳೂರು ಶಾಂತಿನಗರ ಬಸ್ ನಿಲ್ದಾಣದಿಂದ(Shantinagar Bus Station) ಭಾಗಮಂಡಲಕ್ಕೆ ಹೊಸ ರಾಜಹಂಸ ಬಸ್(Rajahamsa Bus) ಸೇವೆಯನ್ನು ಆರಂಭಿಸುತ್ತಿದೆ. ಈ ನೂತನ ಸೇವೆಯು ಮುಂಬರುವ ಅಕ್ಟೋಬರ್ 01, 2026 ರಿಂದ ಅಧಿಕೃತವಾಗಿ ಕಾರ್ಯಾಚರಣೆಗೆ ಬರಲಿದೆ.
ಈ ಸಾರಿಗೆಯು ಬೆಂಗಳೂರಿನ ಶಾಂತಿನಗರ ಬಸ್ ನಿಲ್ದಾಣದಿಂದ ಹೊರಟು ಮೈಸೂರು, ಹುಣಸೂರು, ಕುಶಾಲನಗರ, ಮಡಿಕೇರಿ ಮತ್ತು ಕಾರಗುಂದ ಮಾರ್ಗವಾಗಿ ಭಾಗಮಂಡಲವನ್ನು ತಲುಪಲಿದೆ.
ಬೆಂಗಳೂರಿನಿಂದ ಭಾಗಮಂಡಲಕ್ಕೆ: ಬೆಂಗಳೂರು ಶಾಂತಿನಗರ ಬಸ್ ನಿಲ್ದಾಣದಿಂದ ರಾತ್ರಿ 10:30 ಗಂಟೆಗೆ ಬಸ್ ಹೊರಟು ಮೈಸೂರು ರಸ್ತೆ ಬಸ್ ನಿಲ್ದಾಣದಿಂದ ರಾತ್ರಿ 11:16 ಗಂಟೆಗೆ ಸಾಗಲಿದೆ. ಮರುದಿನ ಬೆಳಗಿನ ಜಾವ 05:15 ಗಂಟೆಗೆ ಮಡಿಕೇರಿಗೆ ಆಗಮಿಸಿ, ಭಾಗಮಂಡಲಕ್ಕೆ ಬೆಳಿಗ್ಗೆ 06:15 ಗಂಟೆಗೆ ತಲುಪಲಿದೆ.
ಭಾಗಮಂಡಲದಿಂದ ಬೆಂಗಳೂರಿಗೆ: ಭಾಗಮಂಡಲದಿಂದ ರಾತ್ರಿ 08:30 ಗಂಟೆಗೆ ಹೊರಟು, ರಾತ್ರಿ 10:00 ಗಂಟೆಗೆ ಮಡಿಕೇರಿಗೆ ಆಗಮಿಸಿ, ಮರುದಿನ ಬೆಳಗಿನ ಜಾವ 04:00 ಗಂಟೆಗೆ ಬೆಂಗಳೂರಿನ ಮೈಸೂರು ರಸ್ತೆ ಬಸ್ ನಿಲ್ದಾಣಕ್ಕೆ ತಲುಪುವುದು. ಅಲ್ಲಿಂದ ಬೆಂಗಳೂರು ಶಾಂತಿನಗರ ಬಸ್ ನಿಲ್ದಾಣವನ್ನು ಬೆಳಗಿನ ಜಾವ 04:30 ಗಂಟೆಗೆ ತಲುಪಲಿದೆ.
ಪ್ರಯಾಣ ದರ ವಿವರ: ಬೆಂಗಳೂರು, ಶಾಂತಿನಗರದಿಂದ ಮಡಿಕೇರಿಗೆ ವಯಸ್ಕರಿಗೆ ರೂ. 545/- ಮತ್ತು ಮಕ್ಕಳಿಗೆ ರೂ. 296/- ಹಾಗೂ ಬೆಂಗಳೂರು ಶಾಂತಿನಗರದಿಂದ ಭಾಗಮಂಡಲಕ್ಕೆ ವಯಸ್ಕರಿಗೆ, ರೂ. 608/- ಮತ್ತು ಮಕ್ಕಳಿಗೆ ರೂ. 328/- ದರ ನಿಗದಿಪಡಿಸಿದೆ.
ಸಾರ್ವಜನಿಕ ಪ್ರಯಾಣಿಕರು ಈ ಹೊಸ ಸಾರಿಗೆ ಸೇವೆಯ ಸೌಲಭ್ಯವನ್ನು ಪಡೆದುಕೊಳ್ಳಬೇಕಾಗಿ ಕೆಎಸ್‌ಆರ್‌ಟಿಸಿ ಬೆಂಗಳೂರು ಕೇಂದ್ರೀಯ ವಿಭಾಗ ಪ್ರಕಟಣೆಯಲ್ಲಿ ತಿಳಿಸಿದೆ.