ಬೆಂಗಳೂರು: ಮಲ್ಲೇಶ್ವರಂ ಕ್ಷೇತ್ರದಲ್ಲಿ ಕಳೆದ ಎರಡು ದಶಕಗಳಿಂದ ಸರ್ಕಾರಿ ಶಿಕ್ಷಣವನ್ನು ಅತ್ಯುನ್ನತ ಮಟ್ಟಕ್ಕೆ ಕೊಂಡೊಯ್ಯುವ ಉದ್ದೇಶದಿಂದ ರೂಪುಗೊಂಡಿರುವ “ಮಲ್ಲೇಶ್ವರಂ ಶಾಲಾ ಮಾದರಿ” (Malleshwaram School Model)ಯನ್ನು ಸಾರ್ವಜನಿಕರಿಗೆ ಪರಿಚಯಿಸುವ ‘ಮಲ್ಲೇಶ್ವರಂ ಓಪನ್ ಡೇ’ (Malleswaram Open Day) ಕಾರ್ಯಕ್ರಮವು ಜುಲೈ 18, 2026 (ಶನಿವಾರ) ಮಧ್ಯಾಹ್ನ 2:00 ಗಂಟೆಯಿಂದ 13ನೇ ಅಡ್ಡರಸ್ತೆಯ ಎಚ್.ವಿ.ಎನ್. ಕರ್ನಾಟಕ ಪಬ್ಲಿಕ್ ಶಾಲೆ ಆವರಣದಲ್ಲಿ ನಡೆಯಲಿದೆ.
ಸರ್ಕಾರಿ ಶಾಲೆಯೊಂದು ಹೇಗೆ ಶಿಶುಪಾಲನಾ ಕೇಂದ್ರ (Creche)ದಿಂದ ಶಾಲೆ, ಪದವಿಪೂರ್ವ, ಪದವಿ, ಸ್ನಾತಕೋತ್ತರ ಹಾಗೂ ಸಂಶೋಧನೆವರೆಗೆ ನಿರಂತರ ಶಿಕ್ಷಣದ ಸಮಗ್ರ ಆವರಣವಾಗಿ ರೂಪುಗೊಂಡಿದೆ ಎಂಬುದನ್ನು ಈ ಕಾರ್ಯಕ್ರಮದಲ್ಲಿ ಸಾರ್ವಜನಿಕರು ನೇರವಾಗಿ ವೀಕ್ಷಿಸಬಹುದು. ಆಧುನಿಕ ಸ್ಮಾರ್ಟ್ ತರಗತಿಗಳು, ವಿಜ್ಞಾನ ಮತ್ತು ಕಂಪ್ಯೂಟರ್ ಪ್ರಯೋಗಾಲಯಗಳು, ಇಂಗ್ಲಿಷ್ ಭಾಷಾ ಪ್ರಯೋಗಾಲಯ, ಕ್ರೀಡಾ ಸೌಲಭ್ಯಗಳು, ಮಿನಿ ಆಂಫಿಥಿಯೇಟರ್, ನಮ್ಮ ಕ್ಲಿನಿಕ್, ಮಕ್ಕಳ ಸ್ನೇಹಿ ಕ್ಯಾಂಪಸ್ ಸೇರಿದಂತೆ ಶಿಕ್ಷಣದ ಸಮಗ್ರ ಅಭಿವೃದ್ಧಿಗೆ ರೂಪಿಸಿರುವ ವ್ಯವಸ್ಥೆಗಳನ್ನು ಪರಿಚಯಿಸಲಾಗುತ್ತದೆ.